الرئيسية
فاطمه قواما لا طول لا قصر مملوكه
فاطمه جميله فى روحا وجميله سلوكا
ما من نوع ارحكى الحفله والدلوكا
كونها واحده من امراء البلاد وملوكا
فاطمه سماحتا تحس القلوب القاسية
فاطمه تناها براق الليالى الماسيه
فاطمه الطاعمة فاطمه الناعمه فاطمه الراسيه
فاطمه الاحلى من ليلى ومحاسن واسيه
فاطمه اللاشكوها ولا شكت جيرانا
فاطمه الهسه فينا مولعات نيرانا
الخله الخلايق والعقول حيرانا
كل ما تقول دا شيخ تلقاهو من حيرانا
فاطمه نجيبه من ولدوها ما غبيانا
فاطمه ظريفه للشافوها من حبيانا
فاطمه جميله ماشاء الله جمال وديانا
وتانى كريمه للضيفان تتب حفيانا
فاطمه ظريفه لا بتتلام ولى لواما
ابداً مى الخفيفه الى الفريق حواما
مى ام دماً تقيل تلقاها يوت نواما
فاطمه تقيه ثم نقيه صلايا وكمان صواما
فاطمه المن نمت بالحله مى كواسه
مى ام نوما تقيل ابداً ومى الهلواسه
بتعرف الاصول وكلاما كلو مواسه
وان طال اللسان ابداً جداد امواسه
فاطمه عليها سمحات الخصال تتلاقا
فاطمه السمحه خلقه والجميله اخلاقا
فاطمه لطيف حديته وفى لسانا طلاقا
فاطمه السمحه فاطمه الفاتت العملاقا
فاطمه الى المحاسن يا حسن قشاقا
انا شايقانى هل يمكن بوادى اشاقا
فاطمه بناتنا والاولاد جميع عشاقا
فاطمه الشافه قالو الشافو مابتشافا
انا ذى فاطمه ابداً ما بطيقو فراقه
عشان زوقه وجمالا وسنها البراقه
فاطمه عفيفه لكن للقلوب سراقه
وبديعه وديعه ممتازه وعريقه عراقه
انا يا فاطمه بنظم فيك سعر معقول
مو مسروق بتاتا حاشه مو منقول
ذى حبى وحنانى صافى مو مقول
يام عقلا بيوزن بى عقولنا عقول
انا يا فاطمه دايما لى لقاك عشمان
ومشتاق لى صباحك كل حين وزمان
جسمى نحيل وما بتحمل الحرمان
كيف حالك دحين ان شاء الله روقه وامان
انا لى فاطمه ابداً ما وجدت مقارن
لافى اكبر البنوت ولافى صغارن
بنات الحله سمحاتا مولعه نارن
هن العمله لكن بت حسن دولارن
انا فاطمه اصبح بى غناك مشهور
بقيت شاعر كبير عملت لى جمهور
طول من صباحك لى تمانيه شهور
شوفتك عندى احسن من ورد وزهور
يا حليل فاطمه وحليل وجها المدور
يا حليل السنون الفى الظلام بتنور
فاطمه جمالا رائع وكل يوم مطور
ذى ماجرحى فاتق وكل ساعه مقور
كم يا فاطمه شاعراً شاهدك غنالك
وكم قلباً مصلب كالحديد حنالك
المجنون تطبى والنصيح جنالك
ونلتى جميع مقاصدك والعزول ما نالك
واحين قالو فاطمه طاقه فينا قميره
واحدين قالو بنخاف سطوتا وتدميره
واحدين قالو ابداً نحنا لينا سميره
واحدين قالو ملكه وناس بيقولو اميره
ليك يا فاطمه فى كل ساعه الف تحيه
يا السمحه الظريفه يام شعوراً حيه
انتى البى القصائد والشعر معنيه
هاك سبعين قصيدة وبرضو عندى النيه
قبيل انا قلت ليكم فاطمه ما بتنسانا
كونها بت قبيله ماصله وانسانا
فاطمه وشيها قمره والعيون نعسانا
حسنها فاق غناى وشكرى دون احسانا
فاطمه حياتا فى كتب الادب مدروسه
فاطمه حلاتا ما جات بالصدف موروسه
كل اديب وشاب يتمنى فاطمه عروسه
فاطمه امانا بى نون والقلم محروسه
انا يافاطمه فى غناى ومناى وسجارى
الناس فى العمل وانا فيك ابارى واجارى
كل ما القى حق الباص مطفر جارى
يالقمحتى عشمانى وجناى وجارى
راجيك يا كريم انا بالفروض الخمسه
وبى الدين الحنيف ايصاً قواعدو الخمسه
طمن قلبى بى شوفت بناتى الخمسه
واجمع شملى بى فاطمه ام حروفا خمسه
انا يا فاطمه شعرى منو البيكمل دربو
وخصوصاً عليك الماسكو بتودربو
ما دامت بريدك وشعرى ليك بفخربو
بحفظو ليك واصونو ما بجوطو واخربو
انا يا فاطمه دايماً فى الشعر فنانك
يا العاجبنى زوقك يا الملكنى حنانك
وحات نورا بيشلع من بياض اسنانك
انا رهن الاشارة حيث ماده بنانك
انا يا فاطمه بى ذكرك تملى مساهر
وفى تاليف غناك اصبحت شاعر ماهر
بحبك ذى جناى حباً مبارك طاهر
انا بيك مقتنع وقنعت باطن وظاهر
