الرئيسية
قوافل الذكرى
قوافل الذكرى لمّا تطوف سهول الخاطر المطروق
تشد ترحل قبل ما تطيب خواطرنا ونبل الشوق
تفوتنا ونحن عطشانين تيبّس في عروقنا عروق
نصايح ليها كان تسمع
وحلو الأيام أكان يرجع
تطيب بينا ودمينا تروق
سواقي الذكريات سايقات يرون بى جداول الريد شتيلات حبنا المصدوق
ويكبرن الشتيلات ديك .. وبى عطر الزهور يشفن تباريح الغرام البيك
ويبردن الحشا المحروق
ولمان ليلي نجمو يصن وأعاين لى هوايلو صباح
تلوليني الهموم وارتاحْ .. مع ذكرة بلدنا الزين وكت نسّام بلدنا يسوق
وأخلف ساقي فوق هم الأيام الجاية وأدّرّق من المجهول أنا المخنوق
تجيني قوافل الذكرى وتشيلني تشيلني لى بلداً بعيد بلحيل مسافتو تقتر السنبرْ
وأصنقر تبْ وأقشْ عيني بعد ما أفوق
واتلفّت وأشوف لا فوق أشوف متلي القمر مشتاق مسافر في تلايت الليل .. يحن للرملة ديك للنيل يقول لى وين نضوقلنا راحة كان بنضوقْ
وعلى صفحة قمرنا بشوف .. وجوه الناس وكت ما تطوف .. وجيه عاشق وجيه معشوق
هيا قمراة فريقنا الليلة كيف خليتي ناسنا الفوق
وكيف الحلة يا القمرة لعلها ضمة مبسوطة ولعل ما فيها زول مريوق
وكيف صبحوا المزارعية وكيف قامو الفجر مارقين علي قصبا سمح مكروق
دحين يا القمرة في ممشاكي قاعدة دحين تلاقيهم .. وعاد كيفن سواقيهن
مراكيبن طواقيهن .. وكيف صوت السواقي الباكية في الفجراوي لما تسوق
وكيفن كسروا اللبقات علي تيرابن المدفوق
وكيف بنوتنا يا القمرة أنا الخليت بليداتن وخليتن سماحة وذوق
حلاتن في مراسيلن .. وأماتتن تناديلن .. يغرزن في مناديلن .. حروف الشوق
قليبا لى يشابيلن .. وعشمان في شبابيلن .. وكيف بلقاها زولا عوق
وكيف حالة غنيماتنا .. البسترن حالنا بيناتنا .. لعل ما عشّن الشُفع وجروهن عليك يا السوق
أمانة أمانة من مرّات .. وكت يجن السنين تارّات ..
نشيل ليهن من المدخور من التيراب نسوي علوق
وكيف حال الكبار في الساحة وحال ديك العلى الدكان حليقاتن تفور وتروق
وديك الجرّن القافات على المرحاكة قالن قوق
وحبوباتن الحافلات علي الجبنة وحلو المنطوق
تناجيلن فناجيلن وريحة البكري والعاشميق مع الحنقوق
وكيف ختن قفيفاتن .. يغزلن في لفيفاتن .. وحس الفندك الغنّاى وريحة الجنزبيل مدقوق
وريحة الجنزبيل والبن تشيلني بعيد .. ترجّع لى كمين عيد
وأقيف وارتاح وأتاوق لى صبايا زمان زمن حبوبتي يوم ما أتوق
وكيف كانت تغني لىْ بى صوتا الحنيّن داك (يا دقدوق)
كدا كدا كداكدا كدا كدا
حلات دقدوق حلات دقدوق يكبر لى يشيل السوق
ولى حبوبتو يتفنجر يجيب الويكة والسبروق
حلات دقدوق وأنا الفرحان أهز وأعرض وأطير لا فوق
تقول حبوبتي هوووووي يا وليد كفاك العرضة أمشْ ناس عاشة جيب لى منهن طايوق
الصاج مابي لى الليلة روح يدنّك الطايوق
أقول لها إلا تاني تغني يا حبوبتي يا دقدوق
تقول لى يا حشاى روح فوت أظنك إنت ما واعي تهبد زى حمير السوق
قدر ما قلت تترحمن أبيت تهبط وأبيت ما تروق
وأقولها غني يا حبوبة عليك الزاكي يا حبوبتي غني لى يا دقدوق
تقول لي يا ولد طير غادي ما تحلفني بالأسياد أهل الطارة والمربوق
عزاز بلحيل ديل يا يابا يلفوني السراع البلحقو المخنوق
ها جنا ها أنت أظن مصفوق
أصبر هسه جدك جايي بوريك سمّح آ المطلوق
أصلو الليلة درت الدقة وما بتطير إنت الليلية ماك مدقوق ؟
واسمع حس حمار جدي المغيرب جايي من الساقية يتنفر تقول محلوق
حماراً كان صعب بلحيل وما بخاف إلا من جدي وجدي وشيهو كلُو عروق
وعراقيهو دمورية بى شوك السدر مشقوق
ومركوبو المجلبط طين مقطّع من هنا وملتوق
كعب كرعيهو من الطين مفلح كلو كلو شقوق
هيا جدي الصبور بلحيل .. عشوق الواطة والساقيات وكت ما يطنطنن في الليل
يقيف شامخ مع الأيام يفوتن فوقو ديل فوق ديل
تقول من طينا مو مخلوق
وينزل جدي يرمي القش وينهر في المعوز مشغول وكيف عاد المعوز بتروق
تك العز بى البلا اليبلاك .. أشوفك يا الكريهة هناك .. معلقة في جزارة السّوق
وينبح غادي ها حروووووم دا وينو الشافع المطلوق
واجري ليهو أنا الخايف خلاص أنا جيت خلاص يا جدي قول لى سوق
جيت آ الرمة سمح الليلة سوق العز دي ودها لى جنا أب كالوق
وقولو العز دي طارحة الليلة وفي شان العويّن ديل تشوف لها لي اللبينة علوق
وأجر العز وألاويها .. وتطاني وأقوم أعضيها .. وأسب محروق
أودي العز وارجعلو .. ألقى خلاص عدل راس البهايم ديك
ووكت رتعن مشينا على العناقريب فوق
وأشوفو بعد زهجتو طرح جبينو الصارم المعروق
ويجيبو الشاى يقول لى جدي عوك آ زول تعال أشربْ أمانة آ ولدي ماك ممحوق
ويضحك جدي فرحان بىْ ويدخّل إيدو في جيبو ويملا لى عبي بلح خلاص الليلة مافي مروق
بعد تاكل تميرك دا تعال أطلع لي فوق كرعي جدك يومو كلو يسوق
دي حالة جدي كل ما يوم يجيبو غروب وللساقيات يودي شروق
وقبّال جدي ما يرتاح يجينا بشير جنا مرزوق
يقول لي جدي قالو ليك ألحقنا الرقاد ملحوق
تعالنا غادي عند الساقية البحر أوعه عقبك زاد والعيار مضايق الساقية يهدم زى حشا المحروق
وقالو الترعة جات مندفقة ملت الفجّة ما شفنالنا تاني شقوق
وقطعت ناس حسين بى غادي قالوا يكوركو للمركب تجيهن فوق
والرّيسْ صباحاً بدري شدّ حمارو قال ما قابل المامون ، يشيلو الفاتحة في ود اختو بت زروق
لكن شُفّع الرّيسْ شُداد بلحيل رموا المركب على الصيحة ومعاهن زول تقول لابسلو سربادوق
ويجي من غادي حاج عثمان راكب في حماراً ليهو تصبقوا النعجة أكان مطلوق
وماشي علينا يلكع فيهو ... ومرّات بالمريد يديهو ... واوعه مريدو يوت مطبوق
والسرج أب عكف يهرج محدّر وبالتلل مشنوق
ويكورك جدي هوووي يا ناس أرح خلونا من عثمان ، يطوطح تقول سكران
والراس التقول مطفوق
أرحكن نلحق الساقية أكان نلقالنا ليها مروق
وقامو الناس كبار وصغار سراع النهمة صبّاقين وما تقول لي زول مصبوق
ومن جاي جوك ولاد عباس وود الغالي ود الياس وحداس حدس الحداس
وديييييك يا الناس على أب طورية واب كاروق
هيا ناس شيشكن أبقو رقاق أبعدو شوية لى أب كالوق
وأب كالوق يفج الناس ويدخل جوة ضنب الساقية
يفك قادوس ورا قادوس ويكورك جروا ديل لا فوق
وآخر الدور يجيهن برّة فوق ضهرو الللس مطبوق
وود التوم يقول للناس ها حلو التور دا ما بتشوفو كيف مخنوق
يحلو التور من الخناق ويجرو الدروة والحوام والدييو والتكم معشوق
وايدك وايدي شالو الساقية بعدت من وشي العيار
هي كانت غير سواعد الخير تشوفلها ضمة تاني مروق
ويزغردن الحريم والناس تهوش والشوق يشيلن شوق
بناتاً زى عواتي الخيل وزى القمرة لما تتم ويعشم فيها أبو الدردوق
يفرّحن القليبو حزين بعد ما داون المجروح من الدفسيبة والمفلوق
قوام زى سكة الصلّاح وزى البان عديل ممشوق
صباحات خير .. يجن بالخير .. وخيرن يوم يجينا كتير.. بلا تأخير يعم المروي والمعتوق
حباب الخير وكت ما يجينا شايلو النيل .. حبابو تجينا شايلا العينة من لا فوق
حباب الخير يجينا كتير يبلل في محولنا حلوق
حباب الخير يجينا سمح .. يخدّر في أرضنا قمح .. صغيرنا مع كبيرنا فرح ..
ويبري جرح زمن مفتوق
وبعد ما تشرب الواطة وخلاص النيل يصد يرجع كتير محموق
يقول عبدالله للجنوى بكرة تجوني عندي نفير يمين يا أخوانا تب مزنوق
كمان شوفلك جنس خازوق
البحر أوعه جاط الفجة شتّت ومحق التيراب كمان حيرني في الماروق
وعاد يتلملموا الجنيات .. شُداد بنيات .. ضعيفن في المروة لحوق
مع النغمات يحفرو يغززو الشعبات ويختو على قرونا مروق
وهاك يا أب عاشمة يا الفلاتي يرفعو في الضلع لا فوق
وفي لحظات يعدلو الكرنق ويعرشوه من دمسيس على عميوق
وديك بى غادي طربانين يكسرو بالغُنى الدُرّاب .. وديك يشيلو في التيراب ..
ويرفعو في التقانت فوق
ولمان الهجيرة تحر ولمان يلحق الملحوق
يجي الزاد الملان بركة أكان كرارة أكان لايوق
طباقة الخير يجن مارقات .. ومن الحلة متصابقات .. غتاها من العجاج طرقات
وسيل الخير يجيك مدفوق
وقام عبدالله هبل النار ومن الجدول الطربان يغسّل في كبابي الشاى وقدر المكرمة المطفوق
ولا عند العصير والناس تشيل في روق تخت في روق
يخلو الواطة حامدة وشاكرة وبى الخيرات يجيها الجدول المدلوق
ديل أهل اللقا المبهول يقدّروا واجبات الزّول ويعرفو حقوقو كان لى حقوق
زمان والدنيا هاشّة وباشّة وخيرا محير المخلوق
زمان والناس حُنان بلحيل .. يشدو الحيل .. وترياق الاهل مبروك قدر ما يجيبو منو تضوق
يقضّي الضيف تلايت الليل وضيف الضّيف وبرضو يحوق
زمان والناس ضمايراً طيبة لا سارق ولا مسروق
تكافيهن سواقيهن قدر ما تقل تتم وتفوق
حنينة الساقية تسقي الناس وترويهن محل ما جرجرو الواسوق
حياتن بى شقاوة العيش هنية مرية شبعانين لبون وسمون ولا عراقي لا معروق
ومستورين بلا حيشان ولا تيبان فخار ودلوق
نفوسن داخلا الرحمن .. وقلوبن عامرة بالايمان .. متمسحة ذوق
وحامدين ربهن شاكرين أكان صبحت بقوت مسلوق
سماهن ديمة عينتا قاجّة ريّها فوق
تضاحك الواطة ليها بروق
تضاحك الواطة ليها بروق
الواطة ليها بروق
ليها بروق
....
[img]
[/img]