الرئيسية
قت بسم الله واتوكلت جبت قصيـــدة
وناوي القومة لي بلداً بشوقني نشــيده
ما تلوموني يا زمالة كوني بريــــده
مما قمت ريدتها ماها حاجة جديـــدة
في كوبر مبيت والليلة ليلة فريـــدة
يبكي سماها تتقطر دموعه شـــديدة
شالعة بروقها تضوي محملة ورعيـدة
يا رافع القدم ختـوتنا تبقى ســعيدة
قمنا دغش قدمنا على الختوتو عديــلة
من بلد السجن شـيلتنا ماها تقيـــلة
صبحت باردة رويانة وشرب ضانقيـله
بس فضل النقيقينق والنسـيمة عليــلة
نور الدين حلف لا الموقف التوصيـلة
حاجة قدر سريعة نهمة لا توصيــله
مناها الليلة عند الدانقـة يبقى مقيـله
ركبنا وجينا موقف بحري برهة قليلة
الباظـات كتيرة موقفـات ريقــان
داك شاحن خلاص قرب يقوم عجلان
وداك قطع تذاكره وركب النســوان
وداك دفسيبتو في الشباك وداك نيسان
ومن عند داك لا عند داك أخوك حيران
بعد حجة ودبال وغلات لقيـنا مـكان
في باظ (الكفاح) باظاً بطي وسجـمان
مشغولة الخلوق بي قصة الخيــران
الواحد يجيك يسـعل تقول ضهبــان
كيف قالوا الدرب؟ لا لا الحكاية ضمان
تقول ضربولو تلفون ولا شافو عيـان
ركبنا وقلنا بسم الله يا رحمــــن
ونور الدين ودعناه الله ود ســلمان
ركب سواقو عشق وقفل البيبـــان
رمالو النمرة شخَر وتوَر الدخــان
وقفينا الخراتيم عاصمة الســـودان
سماها ملان غيوم لا الليـلة مو قنعان
لا الحلفاية مويتو معطنة الحيشــان
فوق حجر الظلت باظنا انطلق طربان
جينا الكدرو ناسو ململمين كيمــان
ديكا يجدولوا وديل عن خشم دكـان
الكباشي بلد الفقرا والحيــــران
جاها مزوزي يرزم وزود النـيران
السقاي مسـقى والشدر رويــان
جداولو مترقنة ومترعة الحيضـان
بالشباك نظر كل البـلد مطــران
شرف الجيلي للفول كركرالمصران
نزلنا الجيلي شفنا الأمة فاقدة دليــله
لا من كان يجيك مهموم ومحنان حيلة
لا فول لا رغيف لا كسرة لا في بليلة
والأزيار خلا والحالة ميها عديــلة
والخرتوم تقول تب ما فضـل في قبيلة
فكة ريقنا قرقوشة ومليحة قليــــلة
قالوا أمرقوا بي هناك حالة ما في مثيلة
خور الجيلي زبد ماهو طفح الكيــلة
عوووك كترة حديد مشرور مسافة طويلة
من باظ سفري لا عند لوري لا تريمبيلة
سحابة متندلة ودافقات أماهي تقيــلة
آاناس الحكاية؟ .. الليلة غرقت فيـلة
بحر داك ولا خور؟ عندو الخلوق منجظرة
بي تحت القضيب أمواجو دافرات دفــرة
ناس بي فوق تتوتي وناس تحت منحشرة
والنغفة التقول يوم عرفة ساعة النفــرة
ناس متشمرة وحارسنو حنك الحفــرة
واحدين قالوا نرجع نستقيم لا بكـــرة
واحدين صنقروا وحالفين يواصلوا السفرة
كملان الفهم والناس بقت منحصـــرة
داك لوري انفخ سواقو جاتو الشـعرة
دوَر داسلو جاز ومكنتو وقفت نقـرة
حالف يا مرق يا اجكنت في الوكــرة
الجهمور وقف وقل موقف وشــرة
تبعوه الرجال شافوه وقع الوعـــرة
وسط الخور جكن رشح الأماهي العكرة
جضوا ورا الخوق شافوه ركب الخترة
جر ودفر صحيح البركة مي من كترة
في بكاننا الثلاثاء نهارا عدا وفــات
موية وطين وخمجيبة وصياح وعياط
لا الغيبة النشاط إتسـهلن مارقــات
والباقي الرجع والصنقرن باركــات
حمدنا الله وركبنا وركبن الحاجـات
تعبان الحديد يقنت على الحدبــات
يمشي القيد حرن عجلاتو متباريـات
حصباية القـلع أمست عجيناً بــات
سرينا الليل حراقيص البروق شالعات
ساعةً في ضهورن وبي الكدر ساعات
الرويان دفق وديانو لي القلعـــات
كلما نمر وديْ نكرم تلات باظــات
برد الليل سهل دربو وفتح لو مجـاري
الركاب جميع حتى الجنا الكمسـاري
نايمين علا انا السهران مولعـة ناري
لي وصول المرام يارب تحل سوجاري
البياح طلع ونزلنا وديان جـــاري
صلينا ودعينا البي مصــاير داري
جنس كوفارة جوعاً شين ومقطوع طاري
مقيل ومبيت قوى ولي الليلة زول موحاري
أهل الخير يعجبوك أعلنوها طـواري
لموا الناس وقجو النار وهجمو لواري
جابوا دقيق وشدوا حلل وعبوا كواري
مافي شبع بطون لاكين حمدنا البـاري
ضحوة الأربحاء والجو منور ودافي
جبـالو مزرقنة وتريان مروى السافي
درنا المرقة من جاري الركوب عنافي
مجرور من ضنيبو وحيلو مو متعافي
نمشي قدم قدم لي الميجة قلنا عوافي
عطشان الحديد وشرابو شرطاً صافي
كمل ألما وقدر شمتانة جارة القافي:
جيدن عاد قبيل درنا الشراب قال مافي
من تنك المحطة غشا وشرب متلافي
فوق وديان سهول الميجا يدهج حافي
وجوهنا مصرصرة وفوقها التعب موخافي
نتشرف هناك قاعدين قعاد وقــافي
عند خور العروسة الناس محانا حيارى
مويتو مولولة وما حبسنُو حجـــارة
كيف الشورة؟ علا تجيـكم الطيــارة
دا ياهو خريف أبوالسعن ان سمعت بشارة
أبنادم بصير ما بتلحق في بصــارة
شاف القبة والراكوبة جاتو حــرارة
أخدنا مسافة باصرنا ومرقنا فتـارى
هجمنا على الرواكيب بس تقول جات غارة
في راسنا الرغيف والدمعـة والعصارة
والماذياني فولةً ضرضرولها شمارها
لقينا الواطة يخرب كان بروش وجرارة
حليل ود بانقا الموجعانا موتة نــارها
مرقنا سلكنا لي دروبا كتير حجــاره
ماتشوف علا معزا وشفعاً تتجــارى
زهج سواقنا يتقنت جبـدلو سـجارة
طالب القوز بليد الطندب أب نــوارة
رمال شرقانة زادت فوق رواها زيـادة
منو القايل بتشرب تروى تلقى مـرادها
فوق حدب الرمال قايدين حديدو قوادة
يزح وحلان ويتقدل مشـيهو نــوادة
في التعشيقة عاد سواقنا عندو شـهادة
جبد لي عصايتو وينما جات خبر مشهاده
كع كسرها ورماها المو نجيض حـدادها
دابة اطينت وصيدتك قمح صــيادها
عقب تكرنَا والناس داجة شايلة أغرادها
فوق وادي البنات نخفج قطعناه خـوادة
ديك الحـلة مـارقة بننتها وأولادهـا
قربنا خلاص على شندي وشرفنا بلادها
كابسنا الحديد والناس كتيرة اعدادهـا
يجرو بلا وعى وماشين تقول في زيادة
كان لي الموية ناقصة الشبكة والجبادة
اتسهلنا ليـل درب المروق محــوادة
دخل شندي العشا والناس جياع وعطاشى
حيشانها وجناينها دوب كرفنا دعاشــها
غشى المركز بلاغ في سرقة الرقاشــة
نزل صاحب القروش جرى كلم الامباشا
مرقو عساكرن حاشو الخلوق دي حواشة
حاجة قدر تناغم ماها خايفة لا حاشــا
هاك أمسك شنطتك قالوا جاية فتاشــة
في الشارع تشوف العالمين تتماشــى
عزلنا أسمح بيوت شندي التقول بيت باشا
ما همانا غير أكلها الكتير وفراشـــها
غاشـانا المناظر أمانة مي غشــاشة
إنجميـنا واتخـابرنا عرفوا خبــرنا
مما قمــنا قصتنا وحكاوي ســفرنا
الزول زولنـا فوق النور جبـدنا وترنا
البيت أب عمود تب قال لي فيه فطرنا
قمنا دغش على المشرع عجالى خترنا
بعد الغمدة فقنا وراق شوية عكــرنا
بنطون شندي يتهادى ودميرة بحـرنا
شـالنا وزوزا بالشرقية ما اتأخــرنا
قطعـنا اللجة فوق القيفة ديك صنقرنا
قمنا جرينا جاي جاي ما في زول بشرنا
صبرنا على الكتير لا بد نتمه صـبرنا
آجنا؟ حدها وين مطركم دي؟ أخاف هي مطرنا؟
وين باظـاتنا؟ أمـانة الليلة ما اتوكرنا
لا ود ابظرف لا الحلبي داك أب حرنة
وتعــاون كلي قلينا ولا كتـــرنا
كان لاقيــن تحت كنباتك اتحشـرنا
حاجة قدر ، ولا يهمك إسمنا وصلنا
وما بنهمـل يمين أكتر علي ما هملنا
نحن جمـاعة اتشاورنا واتوكلــنا
قاولنـا البرينسي ركبـنا واتمهـلنا
على القيزان حدا السيال ضحى اتسهلنا
يسارق في الدروب عجلان على الله تكلنا
مسـكنا الترعة بالتنقيـر سكتنا كتلنا
في خور ود حسوب ساعتين هنا اتوحلنا
سلكنا الساهلة بالحلال طرابى قدلـنا
نختم ديك ونعقب دي ودا ياهو عملنا
لا متين شبه الم’شـهاد واتحلحلنــا
مـددنا الرقاب في كنبتها اتململنــا
إنطرحن وجوهنا وراح شوية زعلنا
طرينا الجبنة حاجة قدر قبيل شن قلنا
من نوراب كمال الدين سريع قبلنا
مغاوير جينا طيبة ومنهن واصلنا
داك جبلابنا وسط الموية شفنا كحلنا
قوز الشيخ غربنا على الغبش ميـلنا
عـند قوزبرة تبَنَـا العفش عدلــنا
صبقنا البوكسي بالعين للخطا استعجلنا
قلنا سـلام خلاص يادوب بلغنا أملنـا
في شـدرة الطبل والبير وقفنا نزلـنا
نحمــدو ربنا المولانا لم شــملنا
سلامة آناس سلامة .. دوبه خف تقلنا
سلام مرتع صبانا العامرة فيها اصلنا
سلام أحبابنا هيي طيبين سلام يا أهلنا
سلام يا الفي رواكيبك ضهر قيــلنا
سلام يالمن هواك دايرين نخلي شغلنا
سلام يالمنكم في الغربة كم طولـنا
ما نسيناك ولا من ريدك إتحولــنا
معاوية قسم أحمد
1/8/1994م
وناوي القومة لي بلداً بشوقني نشــيده
ما تلوموني يا زمالة كوني بريــــده
مما قمت ريدتها ماها حاجة جديـــدة
في كوبر مبيت والليلة ليلة فريـــدة
يبكي سماها تتقطر دموعه شـــديدة
شالعة بروقها تضوي محملة ورعيـدة
يا رافع القدم ختـوتنا تبقى ســعيدة
قمنا دغش قدمنا على الختوتو عديــلة
من بلد السجن شـيلتنا ماها تقيـــلة
صبحت باردة رويانة وشرب ضانقيـله
بس فضل النقيقينق والنسـيمة عليــلة
نور الدين حلف لا الموقف التوصيـلة
حاجة قدر سريعة نهمة لا توصيــله
مناها الليلة عند الدانقـة يبقى مقيـله
ركبنا وجينا موقف بحري برهة قليلة
الباظـات كتيرة موقفـات ريقــان
داك شاحن خلاص قرب يقوم عجلان
وداك قطع تذاكره وركب النســوان
وداك دفسيبتو في الشباك وداك نيسان
ومن عند داك لا عند داك أخوك حيران
بعد حجة ودبال وغلات لقيـنا مـكان
في باظ (الكفاح) باظاً بطي وسجـمان
مشغولة الخلوق بي قصة الخيــران
الواحد يجيك يسـعل تقول ضهبــان
كيف قالوا الدرب؟ لا لا الحكاية ضمان
تقول ضربولو تلفون ولا شافو عيـان
ركبنا وقلنا بسم الله يا رحمــــن
ونور الدين ودعناه الله ود ســلمان
ركب سواقو عشق وقفل البيبـــان
رمالو النمرة شخَر وتوَر الدخــان
وقفينا الخراتيم عاصمة الســـودان
سماها ملان غيوم لا الليـلة مو قنعان
لا الحلفاية مويتو معطنة الحيشــان
فوق حجر الظلت باظنا انطلق طربان
جينا الكدرو ناسو ململمين كيمــان
ديكا يجدولوا وديل عن خشم دكـان
الكباشي بلد الفقرا والحيــــران
جاها مزوزي يرزم وزود النـيران
السقاي مسـقى والشدر رويــان
جداولو مترقنة ومترعة الحيضـان
بالشباك نظر كل البـلد مطــران
شرف الجيلي للفول كركرالمصران
نزلنا الجيلي شفنا الأمة فاقدة دليــله
لا من كان يجيك مهموم ومحنان حيلة
لا فول لا رغيف لا كسرة لا في بليلة
والأزيار خلا والحالة ميها عديــلة
والخرتوم تقول تب ما فضـل في قبيلة
فكة ريقنا قرقوشة ومليحة قليــــلة
قالوا أمرقوا بي هناك حالة ما في مثيلة
خور الجيلي زبد ماهو طفح الكيــلة
عوووك كترة حديد مشرور مسافة طويلة
من باظ سفري لا عند لوري لا تريمبيلة
سحابة متندلة ودافقات أماهي تقيــلة
آاناس الحكاية؟ .. الليلة غرقت فيـلة
بحر داك ولا خور؟ عندو الخلوق منجظرة
بي تحت القضيب أمواجو دافرات دفــرة
ناس بي فوق تتوتي وناس تحت منحشرة
والنغفة التقول يوم عرفة ساعة النفــرة
ناس متشمرة وحارسنو حنك الحفــرة
واحدين قالوا نرجع نستقيم لا بكـــرة
واحدين صنقروا وحالفين يواصلوا السفرة
كملان الفهم والناس بقت منحصـــرة
داك لوري انفخ سواقو جاتو الشـعرة
دوَر داسلو جاز ومكنتو وقفت نقـرة
حالف يا مرق يا اجكنت في الوكــرة
الجهمور وقف وقل موقف وشــرة
تبعوه الرجال شافوه وقع الوعـــرة
وسط الخور جكن رشح الأماهي العكرة
جضوا ورا الخوق شافوه ركب الخترة
جر ودفر صحيح البركة مي من كترة
في بكاننا الثلاثاء نهارا عدا وفــات
موية وطين وخمجيبة وصياح وعياط
لا الغيبة النشاط إتسـهلن مارقــات
والباقي الرجع والصنقرن باركــات
حمدنا الله وركبنا وركبن الحاجـات
تعبان الحديد يقنت على الحدبــات
يمشي القيد حرن عجلاتو متباريـات
حصباية القـلع أمست عجيناً بــات
سرينا الليل حراقيص البروق شالعات
ساعةً في ضهورن وبي الكدر ساعات
الرويان دفق وديانو لي القلعـــات
كلما نمر وديْ نكرم تلات باظــات
برد الليل سهل دربو وفتح لو مجـاري
الركاب جميع حتى الجنا الكمسـاري
نايمين علا انا السهران مولعـة ناري
لي وصول المرام يارب تحل سوجاري
البياح طلع ونزلنا وديان جـــاري
صلينا ودعينا البي مصــاير داري
جنس كوفارة جوعاً شين ومقطوع طاري
مقيل ومبيت قوى ولي الليلة زول موحاري
أهل الخير يعجبوك أعلنوها طـواري
لموا الناس وقجو النار وهجمو لواري
جابوا دقيق وشدوا حلل وعبوا كواري
مافي شبع بطون لاكين حمدنا البـاري
ضحوة الأربحاء والجو منور ودافي
جبـالو مزرقنة وتريان مروى السافي
درنا المرقة من جاري الركوب عنافي
مجرور من ضنيبو وحيلو مو متعافي
نمشي قدم قدم لي الميجة قلنا عوافي
عطشان الحديد وشرابو شرطاً صافي
كمل ألما وقدر شمتانة جارة القافي:
جيدن عاد قبيل درنا الشراب قال مافي
من تنك المحطة غشا وشرب متلافي
فوق وديان سهول الميجا يدهج حافي
وجوهنا مصرصرة وفوقها التعب موخافي
نتشرف هناك قاعدين قعاد وقــافي
عند خور العروسة الناس محانا حيارى
مويتو مولولة وما حبسنُو حجـــارة
كيف الشورة؟ علا تجيـكم الطيــارة
دا ياهو خريف أبوالسعن ان سمعت بشارة
أبنادم بصير ما بتلحق في بصــارة
شاف القبة والراكوبة جاتو حــرارة
أخدنا مسافة باصرنا ومرقنا فتـارى
هجمنا على الرواكيب بس تقول جات غارة
في راسنا الرغيف والدمعـة والعصارة
والماذياني فولةً ضرضرولها شمارها
لقينا الواطة يخرب كان بروش وجرارة
حليل ود بانقا الموجعانا موتة نــارها
مرقنا سلكنا لي دروبا كتير حجــاره
ماتشوف علا معزا وشفعاً تتجــارى
زهج سواقنا يتقنت جبـدلو سـجارة
طالب القوز بليد الطندب أب نــوارة
رمال شرقانة زادت فوق رواها زيـادة
منو القايل بتشرب تروى تلقى مـرادها
فوق حدب الرمال قايدين حديدو قوادة
يزح وحلان ويتقدل مشـيهو نــوادة
في التعشيقة عاد سواقنا عندو شـهادة
جبد لي عصايتو وينما جات خبر مشهاده
كع كسرها ورماها المو نجيض حـدادها
دابة اطينت وصيدتك قمح صــيادها
عقب تكرنَا والناس داجة شايلة أغرادها
فوق وادي البنات نخفج قطعناه خـوادة
ديك الحـلة مـارقة بننتها وأولادهـا
قربنا خلاص على شندي وشرفنا بلادها
كابسنا الحديد والناس كتيرة اعدادهـا
يجرو بلا وعى وماشين تقول في زيادة
كان لي الموية ناقصة الشبكة والجبادة
اتسهلنا ليـل درب المروق محــوادة
دخل شندي العشا والناس جياع وعطاشى
حيشانها وجناينها دوب كرفنا دعاشــها
غشى المركز بلاغ في سرقة الرقاشــة
نزل صاحب القروش جرى كلم الامباشا
مرقو عساكرن حاشو الخلوق دي حواشة
حاجة قدر تناغم ماها خايفة لا حاشــا
هاك أمسك شنطتك قالوا جاية فتاشــة
في الشارع تشوف العالمين تتماشــى
عزلنا أسمح بيوت شندي التقول بيت باشا
ما همانا غير أكلها الكتير وفراشـــها
غاشـانا المناظر أمانة مي غشــاشة
إنجميـنا واتخـابرنا عرفوا خبــرنا
مما قمــنا قصتنا وحكاوي ســفرنا
الزول زولنـا فوق النور جبـدنا وترنا
البيت أب عمود تب قال لي فيه فطرنا
قمنا دغش على المشرع عجالى خترنا
بعد الغمدة فقنا وراق شوية عكــرنا
بنطون شندي يتهادى ودميرة بحـرنا
شـالنا وزوزا بالشرقية ما اتأخــرنا
قطعـنا اللجة فوق القيفة ديك صنقرنا
قمنا جرينا جاي جاي ما في زول بشرنا
صبرنا على الكتير لا بد نتمه صـبرنا
آجنا؟ حدها وين مطركم دي؟ أخاف هي مطرنا؟
وين باظـاتنا؟ أمـانة الليلة ما اتوكرنا
لا ود ابظرف لا الحلبي داك أب حرنة
وتعــاون كلي قلينا ولا كتـــرنا
كان لاقيــن تحت كنباتك اتحشـرنا
حاجة قدر ، ولا يهمك إسمنا وصلنا
وما بنهمـل يمين أكتر علي ما هملنا
نحن جمـاعة اتشاورنا واتوكلــنا
قاولنـا البرينسي ركبـنا واتمهـلنا
على القيزان حدا السيال ضحى اتسهلنا
يسارق في الدروب عجلان على الله تكلنا
مسـكنا الترعة بالتنقيـر سكتنا كتلنا
في خور ود حسوب ساعتين هنا اتوحلنا
سلكنا الساهلة بالحلال طرابى قدلـنا
نختم ديك ونعقب دي ودا ياهو عملنا
لا متين شبه الم’شـهاد واتحلحلنــا
مـددنا الرقاب في كنبتها اتململنــا
إنطرحن وجوهنا وراح شوية زعلنا
طرينا الجبنة حاجة قدر قبيل شن قلنا
من نوراب كمال الدين سريع قبلنا
مغاوير جينا طيبة ومنهن واصلنا
داك جبلابنا وسط الموية شفنا كحلنا
قوز الشيخ غربنا على الغبش ميـلنا
عـند قوزبرة تبَنَـا العفش عدلــنا
صبقنا البوكسي بالعين للخطا استعجلنا
قلنا سـلام خلاص يادوب بلغنا أملنـا
في شـدرة الطبل والبير وقفنا نزلـنا
نحمــدو ربنا المولانا لم شــملنا
سلامة آناس سلامة .. دوبه خف تقلنا
سلام مرتع صبانا العامرة فيها اصلنا
سلام أحبابنا هيي طيبين سلام يا أهلنا
سلام يا الفي رواكيبك ضهر قيــلنا
سلام يالمن هواك دايرين نخلي شغلنا
سلام يالمنكم في الغربة كم طولـنا
ما نسيناك ولا من ريدك إتحولــنا
معاوية قسم أحمد
1/8/1994م